Znezla n maggu 2001 i iḥuzen ddeqs seg Tmurt n Yeqvayliyen di tama n yil teǧǧa tamnaḍt n Zemmuri di yir tagnit, d iseggasen aya tura.

Maca di sin iseggasen yezrin, tamnaḍt-a tevda tetteffeɣ-d si yir targit i deg tella, ladɣa segmi telli deg-s yiwet n tnezduɣt tasdawant m sin igiman (2000) n wusawen.

Daɣ segmi d-ynulfa deg-s wesqamu adelsan n inelmaden, Zemmuri tevda teteffeɣ-d seg tekwat i deg tettwaɛzel.

Di tfaskiwin tidelsanin i d-yettwahiyyan i lmend useggas amaynut amaziɣ, inelmaden n tnezduɣt tasdawant n Zemmuri i yettavaɛen Bumerdes ɛerḍen-d, ass-nni n 10 Yennayer 2010, yiwet n tervaɛt umussu n Timanit i deg yella Mass Muḥend Lɛervi Ṭeyyev d mass Aẓru Lukad i igan asarag s wezwel : « Amezruy n Yennayer d yimal n Tmurt n Yeqvayliyen ».

Di temlilit-a tamezwarut, wid yessudsen tafaska ssawḍen ad qedcen akken yessefk, ihi yella-d weskan n tɣawsiwin tidelsanin yurzen ansayen n Tmurt n Yeqvayliyen am ideqqi, tiqvatin uɣanim, nnḥas, lfeṭṭa, aẓeṭṭa...maca d askan n yedlisen d isevtaren n yeɣmisen d-yewwin ɣef umecwar n MCB, umussu n Leɛrac d umennuɣ n tɣamsa tagdudant i d-ijevden ugar tamuɣli n inevgawen.

Aduktur M.L Ṭeyyev yewwi-d i yimmikkiyen usarag awal ɣef tmacahut n Yennayer i yevdan 950 iseggasen send talalit n Σisa. Dɣa yemmeslay-d ɣef yal tallit umezruy i d-yezger Yennayer d wamek yella ireṣṣa deg yedles n Tefriqt ugafa u yeqqel ass-a d azamul n tnekkit i deg yeṭṭef weɣref aqvayli. Si tama-s, Aẓru Lukad yemmeslay-d ɣef wamek i d-tewwi a d-yer weɣref aqvayli tinkkit-is u a tt-yeḥrez mgal tigreɣlanit akk d ttukksa n izerfan sɣur adavu adzayri i yettkemmilen di tsertit-is tamsiḥrest.

Γer taggara usarag, yal wa yenna d akken timlilit-a tamezwarut n Zemmuri tefka-d udem n tdukli yelhan ger inelmaden n tesdawit d yimeɣnasen d-yusan ad mbaddalen tikta s tin n tegmatt d uqader.

Tamurt, ass n 11 di yennayer 2010